Delte meiningar om bondeaksjon

Midtdølene støttar kravet til bøndene om betre betaling for jobben dei gjer. Men dei likar dårleg at aksjonane går utover "mannen i gata".

Ei høgst uformell spørjeundersøking ved brødhyllene på Vinstra denne veka, tyder på at midtdøler flest er einige med bøndene om at dei må få betre betalt for varene dei leverer.

- Feil framgangsmåte

Samtidig er folk einige om at dei bør vera varsame med aksjonsforma.

- Eg støtter krava til bøndene, men ikkje opprøret. Det er ingen tvil om at dei skulle hatt mye betre betalt, men dette er ikkje måten å gjere det på, seier Gjermund Engum frå Ruste til Dølen.

På morgonkvisten tysdag fylte Kiwi-tilsette på Vinstra opp hyllene med fersk kaku. Da Sofie Kampesæter frå Vinstra skulle handle klokka 12, var det tomt.

Ho er ikkje einig i alt bøndene foretek seg desse dagane.

- Mat må vi sjølvsagt ha, men eg meiner bøndene kunne spart seg trusselen om mjølmangel. Det går jo an å importere mat au, seier ho.

Sjå denne vekas leiar: "Franske bønder"

Oddborg Holmestad frå Vinstra er einig.

- Dei har fått eit for dårleg tilbod, og eg forstår at dei må gjera noko, men eg syns ikkje det skal gå ut over menigmann.

- Til å få gåsehud av

Therese Rudi er leiar for Ringebu og Fåvang bonde- og småbrukarlag. Denne helga organiserte ho traktoraksjon blant midtdalsbøndene - ei aksjonsform som haustar mye støtte. 70 traktorar rulla ut på E6 søndag.

- Å sjå 70 traktorar rulle forbi Fryatun var til å få gåsehud av! Spontanaksjonen vart planlagt natt til søndag, så oppmøtet var kjempebra, fortel Therese Rudi.

Mjølblokkaden er nå oppheva, men måndag har bøndene varsla at dei inntek hovudstaden for å markere seg.

Sjå denne vekas leiar: "Franske bønder"