Liv og røre i Skåbu

Til helga skal skåbyggingane igjen vise at bygda er Liv Lågå. Og Skåburevyen er sjølvskrivne på programmet - i år under den passande tittelen "Spent berre tull". 

I Skåbu arrangerer dei også i år Liv Lågå i midten av juli, der eitt av dei desiderte høgdepunkta – i alle fall for bygdefolket – er lokalrevyen som tradisjonen tru går for fulle hus på Bygdahuset. I år har revyen fått tittelen "Spent berre tull".

– Det er fordi det er nettopp det: Spent berre tull, forklarar ein av aktørane, tekstforfattar og skodespelar Geir Grosberg.

Medrevyist Per Steinar Brendløkken nyanserer bildet noko.

– Det blir nok litt alvor også, smiler Brendløkken bak ei rad av særdeles skakke og forslåtte (og for ordens skuld falske) tenner. Dei har han ikledd seg i anledning fotografering, og ein spesiell seanse under årets revy.

– For aller fyrste gong skal vi i år gi ut julingprisen under revyen, gliser revykarane.

Rikhaldig program

Kven den heldige vinnaren er vil dei ikkje avsløre, så det må ein gå på revy for å få vite! Men Skåbu er altså staden i sommar, dersom ein ønskjer seg reale knyttnevekampar. Geir Grosberg skriv mange av tekstane til revyen – og det er som sagt spent berre tull. Mange av tekstane blir visstnok til på traktoren.

– Blant anna har vi ein sketsj i år som tek for seg og heidrar folk som har sett Skåbu på kartet, da særleg på fest, seier ein hemmelegheitsfull Grosberg til Dølen.

Nytt av året er ølservering attåt revyen – så blir det enda morosammare. Ølet er sjølvsagt også produsert i Skåbu – hos Arthur Bredli på Ruten fjellstue.

I tillegg til revyen finn ein att dei gode, gamle programpostane under årets Liv Lågå. Her er det marknadsdag, liv og moro frå utescena i Samvirkelagsgarden, familiekveld ved Slangslona, konsert med Aasmund Nordstoga og mye meir.

– Tidlegare år har vi vore veldig godt nøgde med oppmøtet, og vi håpar på ny rekord i år, seier Per Steinar Brendløkken.