Dermed får Byfesten kommande helg ein lang og levande attraksjon i form av eit langt tog gjennom Nedregate.
Frå sigd til gps
Nord-Fron sau og geit, Nord-Fron og Kvikne bondelag, Nord-Fron bonde- og småbrukarlag, Gudbrandsdal dølahestlag og Ruste bygdekvinnelag tok utfordringa, slik at det nå er klart for ei kortesje med 36 ulike innslag, som syner historia til landbruket frå hest til gps-styrt traktor. Omtrent midt i kortesja kjem ein gamal mjølkebil med plan; der sit etter plana kandidatane til Årets midtdalsbonde, som skal kårast frå Nordigard scene ved høgstdag.
– Fremst kjem to premiehestar i tospann, og ganske kronologisk kjem alt frå såmaskiner og mjølkemaskin, folk og dyr – før ein high-tech gps-styrt traktor kjem til slutt, seier Heggestuen.
Vidare til Kronprinsparet
Hestane er ikkje kven-som-helst; seinare i haust skal 1. premierte Bjonfrida, eigar Ingunn Tofte, og 3. premierte Mie, med eigar Guro Hagen til Dyrskun i Seljord for å kjøre Kronprinsparet.
I området ved pakkhuset, der opptoget til slutt endar, har heile fem landbruksmaskinforhandlarar utstilling. I Stasjonsparken blir det dyreutstilling, og nord for for parken blir det mellom anna barneriding.
Anne Kari Haugalien kjem også, med boardercolliane Selma og Java, for å syne fram sauegjeting.
- Vanlegvis jobbar vi jo på mykje større område, men det blir for å syne prinsippa, seier ho.
Heile helga
Byfesten tek til fredag, med kickoff for prosjektet 2046, og seinare juniorbyfest for barna på kvelden.
Laurdag startar dei sprekaste i Hånåhoppløpet i Sorpera, før den offisielle opninga av byfesten skjer i sentrum – på byscena ved Palmerhagen.
Fire kunstutstillingar, dyr i stasjonsparken, barneriding, oppvisning med gjetarhund, yoga, klatretårn og hestedrosje er noko av det som er sjå og gjera på Vinstra laurdag. Konsertar blir det også, frå båe scenene, til langt utover kvelden.