Den 4. mars startar Ringebu musikkforening si 135-årsfeiring med konsert. Dei er den 7. eldste musikkforeninga i landet, og startar feiringa med Hans Majestets Kongens garde, gardemusikken, i konsert.
Verneverdig drift
– Såpass må det vera. Vi er vel heilt i toppen i landet, når det gjeld musikkforeningar i kontinuerleg drift, seier leiar Bjørn Haugen.
– Etter føresegnene i kulturminneloven er vi verneverdige, legg han til.
Den høgst oppegåande foreninga også spela sjølv i jubileumsåret.
– Vi kallar det jubileum, vi er så gamle at vi tykkjer det er greit å feire kvart femte år, seier Haugen.
Folkefest
Dei har lyst til å be inn folket til ein skikkeleg folkefest i løpet av året, mellom anna. Og det blir i alle fall èin tur til paviljongen i Kaupangerparken, reist av musikkforeninga i si tid.
– Da musikkforeninga starta, fekk dei eit rentefritt lån på 400 kroner av Ringebu sparebank, til innkjøp av dei fyrste instrumenta.
I starten vart det spela på to b-kornettar, ein ess-kornett, to althorn, ein basun (trombone) og ein tuba. Den fyrste dirigenten, Ottar Ottesen, var også instruktør det fyrste året. Til saman, med nokre av dei i fleire omgangar, har korpset hatt 24 dirigentar.
Komponerte for korpset
Lengst tid som dirigent har Ole J. Lien.
– Han kom fra Halvfarelia, og gjekk underoffiserskule i Halden. Der hadde han mellom anna Oscar Borg som instruktør, ein komponist, spesielt kjent for marsjkomposisjonane sine, fortel Haugen.
Lien reiste heim til Ringebu og eit yrke som skomakar og organist, i staden for å ta ved tilbod om å å gå inn i Divisjonsmusikken. I tillegg til å dirigere musikkforeninga, komponerte og arrangerte han det meste av repertoaret.
– Han tilpassa nivået til den enkelte musiker, og arrangementa hans blir framleis brukt ved spesielle høve. Østen Toft, som var dirigent, komponist og arrangør, er det også arrangementer etter i arkivet, som vi nå er i ferd med å digitalisere, seier Haugen, og lovar at det kan bli komposisjonar og arrangement frå arkiva i jubileumsåret.