Dei siste åra har vi på Vinstra fått mange fine grøntanlegg. Flotte rosebusker m.m. og trerekker ved Sødorptunet, kommunal park i Palmerhagen i Nedregate, fine busker ved Biltema i Lomoen, spennande anlegg ved Peer Gynt Spiseri og Hotell og ikkje minst vakkert grøntanlegg i den nye Vinstraparken ved Vinstrahallen/VVS.
Ansvaret for å halde desse anlegga ved like, ligg delvis på kommunen og truleg delvis på Statens vegvesen eller Bane Nor. Men også private næringsforetak har ansvar for sine område. Ein privat næringsdrivande som følgjer opp dette på ein god måte, er etter mitt syn Halvard Pettersen i Nedregate. Kanskje fleire næringsdrivande greier å følgje opp like fint på sine område?
Lenge har mange irritert seg over denne mangelen på stell av grøntanlegga. I staden for å irritere oss, kunne vi kanskje gjera noko med dette. Eg foreslår at vi lagar ein dugnadsgjeng av frivillige spreke gamle og eventuelt enda sprekare unge som 3-4 gongar i løpet av sommarhalvåret kan ta nokre timars sjau for å pynte opp.
Det kan sikkert bli til glede for dei som blir med i gruppa, og det blir sikkert også til glede for alle dei fastbuande og tilreisande som besøker Vinstra sentrum i komande somrar. Alle som har lyst til å vera med i ein slik dugnadsgjeng, kan ta kontakt med meg på telefon 90747875.