Fyrste del av selskapet, TIMBR Ledelse, reindyrkar leiarutvikling i privat næringsliv, medan eit nytt skot på stammen, TIMBR Experience, i år skal forsøke å selja seg inn i eit kjøpesterkt segment av reise- og opplevingsmarknaden.

Wow-faktor

Den lange historia kort, handlar om at Siv Sviland Høye og ektemannen Kjetil Høye Sviland, kjøpte garden som i generasjonar hadde vore i slekta hennar, for nokre år sidan. Å skape noko her, har vore det viktige, og da med utgangspunkt i det dei kan og har erfaringar og kompetanse frå. Leiarutvikling er Siv sitt område i ei årrekkje, sist frå Statoil ASA, og ektemannen har kommunikasjon som fag. Nå som kommunikasjonsdirektør i Virke, tidlegare som journalist og produsent i TV2. Med på laget har dei nettopp fått Silje Flatmoen, nyleg avgått leiar i Nasjonalparkriket reiseliv og ringebujente med bakgrunn frå nettopp opplevingsbasert reiseliv.

TIMBR er selskapet som sameinar kompetansen, og leiarutvikling med Ringebu, garden Høye og omgjevnader har vore såpass vellykka, at dei nå satsar vidare med opplevingsbiten og Flatmoen som dagleg leiar. Attendemeldingane etter leiarsamlingane er at folk ønskjer seg attende hit, til naturen og opplevingar som stuttreiste måltid i seterfjøset på Pulla og utsikt frå lavvoen nede på garden.

– I starten var vi jo spent på om dette var godt nok, eg kjenner jo til standarden desse leiarane er vand med, og var usikker på om det vi hadde å tilby her heldt mål. Det viste seg at det for mange var ein wow-faktor berre å koma hit, seier ho.

«Heilt» til Ringebu

I tillegg gjer den enkle standarden at deltakarane er «tvinga» til å vera tett på kvarandre, og det meiner ho gjev resultat direkte i leiarutviklinga.

– Leiing handlar om å sjå medarbeidarar, sjå kvarandre, vera til og greie å kommunisera ein bodskap. Dette får dei bevisstheit om og trening på i dei ulike fasilitetane vi kan bruke på garden.

– Men kva er forskjellen på eit leiarutviklingsprogram her, mot til dømes eit kurs på BI?

– Vi skil oss ut oss på nærleiken til den enkeltes problemstilling. Mykje av teorien er den same, men innpakninga er ulik. Konkurransa er stor, og det er mange gode aktørar vi konkurrerer med, seier ho.

Likevel meiner ho dei får til noko anna med programma i Ringebu.

– Det som ligg i botnen for alle folk er eit behov for utvikling. Alle likar å kjenne at dei har levert bra og fått til noko. Mange leiarar greier ikkje å kjenne på det, det har vorte meir rapportering og mindre mellommenneskeleg kontakt med dei ein skal leie. Her held vi på dei heile tida, det kan vera brutalt, men fører til endring, seier ho.

Det store nettverket Høye har etter mange år i bransjen, kjem godt med. Å få bedrifter til å bruke pengar på å utvikle leiarane sine så langt unna som i Ringebu, er ikkje like lett som å gjera det same i Oslo. Både pengar og tid er ein faktor, men når folk fyrst kjem til hit er erfaringa at det ikkje er så langt likevel, meiner Høye.

Potensial for meir

Og mange ser kvaliteter dei ønskjer å dele med fleire.

– Hit skulle eg gjerne hatt med familien min, høyrer vi ofte, seier ho. Den spede spira til TIMBR Experience ligg nettopp der. Opplevingar og omgjevnadene i Gudbrandsdalen med alle nasjonalparkane er underkommunisert, ikkje minst i ein internasjonal marknad, meiner gründarane.

I fyrste omgang skal Flatmoen som dagleg leiar legge til rette for opplevingar knytt til leiarutviklingsprogramma, men målet er å koma over på privatmarknaden. Målsettinga i løpet av året er å gjennomføre fem såkalla pilotturar og å 20 lage ferdige turpakker til innsalg. TIMBR Experience skal vera oppe og gå. Rett over nyåret er nettsider med bestillingsside klar. Ein Haute Route-tur innbakt i ei leiarutviklingssamling er ein av turane som skal gjennomførast. Sju av dei høgste toppane i Jotunheimen skal nås. Og nye toppar ventar.

– Det er nå vi gjev gass – og vi skal vera fyrstevalet om fem år, avsluttar dei.