Konsernet får eigarar frå Innlandet, med Vinstra elektro-gründer Tore Sæthersmoen som ein av fire.
I lokala til GEI har oppussinga av kontor vore i gang ei stund, her blir det samlokalisering.
Lærling Østen Haug trudde han jobba med nye kontor til dei i etasjen over, før beskjed om samanslåinga kom måndag.
– Spennande, syns han.
Dei tillitsvalde i GEI og ELØK seier mottakinga var blanda, men optimistisk. I GEI har det vore permitteringar i vinter.
– Folk er uroa for om det blir nok oppdrag til alle, seier tillitsvald Anders Myhre.
Tore Sætersmoen seier mykje av grunnen til samanslåinga er nettopp å kunne få meir å gjera, og kunne jamne ut sesongsvingningane som har føld bransjen.
Leiarduo
Susann Endrestad, som er dagleg leiar i Eløk i dag, får den funksjonen også i det nye selskapet. Ho dannar leiarduo saman med dagleg leiar i GEI Øyvind Sæthersmoen, som går inn som økonomisjef.
– Det er veldig godt å ha eigarar som er lokale, og kort veg til avgjerder, seier Endrestad.
Endringa trer i kraft 1. september, men prosessen med å samkjøre ulike system startar nå.
– Har de noko spesielt større prosjekt i tankane allereie?
– Vi har jo veldig lyst på el-installasjonsarbeida i Nedre-Otta-utbygginga, vedgår Tore Sætersmoen.
ELØK gjennomførte tilsvarande arbeid på Rosten kraftverk i fjor.
– Nå får vi fleire folk å hente frå, både i antal og kompetanse, og vi håpar det skal gje ein god effekt, seier Øyvind Sæthersmoen.
Mål om 5000 abonnement på eitt år
Heiar på nerding
Det nye selskapet satsar på gjennomføring av større prosjekt, ved å tilsetja ein person øyremerkt til nettopp det.
– Det trengs nokon dedikert til gjennomføring av prosjekt i ei bransje som er stadig meir komplisert, seier Tore.
– Før var vi for små til å vera store, og for store til å vera små, nå opnar vi for at fleire kan spesialisere seg, seier Øyvind.
– Så det blir meir nerding?
– Ja, vi skal ha nerdane i faget vårt, dette er eit teknisk fag, og det skal vi heie fram, seier Tore.
Å stå sterkt fagleg og selja riktig kompetanse blir ennå meir viktig framover, meiner dei.
Uroar seg for skuleløpet
– Derfor er vi uroa over nedlegginga av det eine løpet til elektrofag på vidaregåande, og er redd det blir mindre attraktivt å søkje elektro, seier Tore Sæthersmoen.
Installasjonsbedriftene er saman allereie største mottakaren av lærlingar frå vidaregåande på Vinstra og er heilt avhengige av denne rekrutteringsarenaen.
– Vi er uroa for fagmiljøet, med usikkerheit om dei vidare løpa. Viktigaste rekrutteringa vår er lærlingar, seier Susann Endrestad.
– Vi må ha folk som kan ta oss inn i den digitale verda, datalina er også viktig, seier dei.
Dessutan er den digitale satsinga ein stor del av overbygninga, når namneskiftet kjem.
– Vi skal serve dei lokale kundane som vi alltid har gjort, samstundes som vi skal bli synlege også i en større marknad, seier Tore Sæthersmoen.