Sheep o høy er eit årleg arrangement på Rudi Gard, der eit av høgdepunkta er saueklypparkonkurransen der nokre av Norges (og verdas) beste saueklypparar kappast om å klyppe fortast.

Sendt på P3

Fleire hundre midtdøler møter vanlegvis opp på arrangementet, som særleg samlar folk innafor sauenæringa. Årets Sheep o høy gjekk av stabelen laurdag, og til stades var også NRK-profilen Line Elvsåshagen, i samband med programserien "Line dater Norge" på P3.

Kanalen sendte eit innslag frå Rudi gard, og i kjølvatnet av det har dyrevernorganisasasjonen NOAH gått til anmeldelse av arrangementet.

- Frykt er ikkje underhaldning

I ei uttale på sine Facebook-sider, skriv dyrevernorganisasjonen NOAH følgjande tysdag ettermiddag:

"Dyrs frykt er ikke underholdning. Derfor velger NOAH å anmelde dette arrangementet hvor sauer dras opp på en scene i sterk larm og med mange stressfaktorer, for å bli klippet.

Slik brytes medfølelse med dyrene ned: Man forteller seg selv og andre at dyr som viser tydelig frykt og ubehag "koser seg". Dette er ett av mange aspekter av industrielt husdyrhold - og dette er ikke det eneste arrangementet hvor sauer stresses for underholdningens skyld. Kjøttbransjen vil ha oss til å tro at dyrene ikke føler det de blir utsatt for. Åpenbart er dette feil.

Det hadde klart vært å foretrekke at P3 kunne vist en mer kritisk holdning til slik behandling av dyr, og ikke la seg forlede av arrangørenes bagatellisering av dyrenes opplevelser".

I forståing med Mattilsynet

Øystein Rudi på Rudi Gard seier dei er svært opptatt av dyrevelferd, men at dei har ikkje fått informasjon om nokon anmeldelse.

- Men generelt sett kan eg seie at dette er eit arrangement vi gjer i forståing med Mattilsynet, seier Rudi til Dølen.

Heller ikkje fungerande lensmann i Midt-Gudbrandsdalen, Jon Gaarden, kjenner til nokon anmeldelse.

- Det har ikkje vi mottatt, så det er heilt ukjent for meg. Men det kan vera levert inn til Innlandet sentralt, eller til Lillehammer, seier Gaarden til Dølen.